Kabhi bahaar na aai bahaar ki surat

kabhi bahaar na aai bahaar ki surat
badal gai chaman-e-rozgar ki surat

hawa-e-lutf-o-karam ke faqat sahaare par
paDe hain rah mein gard-o-ghubar ki surat

wafa ki shakl na dekhi tumhaare wadon par
yahi zamane mein hai eatibar ki surat

pas-e-fana meri qismat khuli wo rote hain
KHud apne ghar mein bana kar mazar ki surat

bagula dekh ke shukr-e-KHuda wo kahte hain
nazar mein phir gai ek KHaksar ki surat

jidhar zamana phira main bhi sath sath phira
jo rang dekha wahi iKHtiyar ki surat

har ek baat pe chubhti hui jo kahta hun
tumhaare dil mein khaTakta hun KHar ki surat

kisi ka bhes bharenge 'saKHa' hain chalte hue
hazar rup se dekhenge yar ki surat