Kab faraghat thi gham-e-subh-o-masa se mujhko

kab faraghat thi gham-e-subh-o-masa se mujh ko
rose o shab kaam raha aah-o-buka se mujh ko

pas-e-KHatir se na dushman ke sitam kar mujh par
khelna aata hai ai dost qaza se mujh ko

hae aalam shab-e-furqat meri mayusi ka
deti hai maut ki ummid dilase mujh ko

tha teri fitna-KHirami se ayan dil ka maal
bu-e-KHun aati hai naqsh-e-kaf-e-pa se mujh ko

ai 'wafa' mausam-e-wahshat bhi hai kya mausam-e-gul
kyun bachate hain gulistan ki hawa se mujh ko