kali raaton ko bhi rangin kaha hai main ne
teri har baat pe aamin kaha hai main ne
teri dastar pe tanqid ki himmat to nahin
apni pa-posh ko qalin kaha hai main ne
maslahat kahiye use ya ki siyasat kahiye
chil kawwon ko bhi shahin kaha hai main ne
zaiqe barha aankhon mein maza dete hain
baz chehron ko bhi namkin kaha hai main ne
tu ne fan ki nahin shajre ki himayat ki hai
tere eazaz ko tauhin kaha hai main ne
Ghazal
Kali raaton ko bhi rangin kaha hai maine
Rahat Indori