judai ke sadmon ko Tale hue hain
chale jao hum dil sambhaale hue hain
zamane ki fikron ne khaya hai hum ko
hazaron ke munh ke niwale hue hain
gazand apne hathon se pahuncha hai hum ko
ye sanp aastinon ke pale hue hain
nahin nam ko un mein bu-e-murawwat
ye gul-ru mere dekhe-bhaale hue hain
nahin e'tibar ek dam zindagi ka
azal se qaza ke hawale hue hain
hazaron ko the sarfaroshi ke dawe
tasadduq fida hone wale hue hain
ham-awaz hain aish o gham donon lekin
tarane ye Thahre wo nale hue hain
'munir' ab rah-e-haq mein laghzish na hogi
yad-ullah mujh ko sambhaale hue hain
Ghazal
Judai ke sadmon ko Tale hue hain
Muneer Shikohabadi