Jo tu hi sanam humse be-zar hoga

jo tu hi sanam hum se be-zar hoga
to jina hamein apna dushwar hoga

gham-e-hijr rakkhega be-tab dil ko
hamein kuDhte kuDhte kuchh aazar hoga

jo ifraat-e-ulfat hai aisa to aashiq
koi din mein barson ka bimar hoga

uchaTti mulaqat kab tak rahegi
kabhu to tah-e-dil se bhi yar hoga

tujhe dekh kar lag gaya dil na jaana
ki us sang-dil se hamein pyar hoga

laga karne hijran saKHti se saKHti
KHuda jaane kya aaKHir-e-kar hoga

yahi hoga kya hoga 'mir' hi na honge
jo tu hoga be-yar gham-KHwar hoga