jo nazar aana saken aise bhi manzar dekhen
dekhne wale kabhi apne bhi andar dekhen
rang ke jism chhuen nur ke paikar dekhen
KHwab ki shahr-panahon mein utar kar dekhen
waqt ne sab se baDa war kiya hai hum par
kis bulandi se giraata hai muqaddar dekhen
dekhna ye hai ki kya radd-e-amal hota hai
apne ham-zad ko pahlu se jhaTak kar dekhen
ittifaq aisa bhi ek rose mayassar aae
dur se apne ko haalat ki zad par dekhen
dur-uftada jazira hi nikal aae koi
us ki aankhon ke samundar mein utar kar dekhen
Ghazal
Jo nazar aana saken aise bhi manzar dekhen
Atiiqullah