Jo bujh sake na kabhi dil mein hai wo aag bhari

jo bujh sake na kabhi dil mein hai wo aag bhari
bala-e-jaan hai mohabbat mein fitrat-e-bashari

qafas mein hum ne hazaron asir dekhe hain
raha hai kis ka salamat ghurur-e-baal-o-pari

tere jamal ke asrar kaun samjhega
panah mang raha hai shuur-e-dida-dari

safar adam ka hai dushwar tu akela hai
mujhe bhi sath liye chal sitara-e-sahari

bana bana ke har ek shisha toD deta hai
ajib shai hai mere shishagar ki shishagari

tabahiyon ka zamana hai hoshiyar raho
KHabar ke rang mein zahir hui hai be-KHabari

junun ka muzhda-e-fursat ki in dinon 'shaariq'
KHirad ka dast-e-mubarak hai waqf-e-jama-dari