jitna tera hukm tha utni sanwari zindagi
apni marzi se kahan hum ne guzari zindagi
mere andar ek naya gham rose rakh jata hai kaun
rafta rafta ho rahi hai aur bhaari zindagi
ruh ki taskin ke sare dariche khul gae
dard ke pahlu mein jab aai hamari zindagi
sirf thi KHana-badoshi ya mohabbat ka junun
hijraten karta raha ek shaKHs sari zindagi
ek lafz-e-kun kaha aabaad sannaTe hue
aasmanon se zaminon par utari zindagi
Ghazal
Jitna tera hukm tha utni sanwari zindagi
Azm Shakri