jis ko jaana tha kal tak KHuda ki tarah
aaj milta hai wo aashna ki tarah
meri hasti bhi ho jaegi jawedan
dast-e-qatil uTha hai dua ki tarah
us ke hathon pe hain mere KHun ke nishan
jo mahakte hain rang-e-hina ki tarah
justuju hai mujhe aaj us shaKHs ki
jo wafa bhi kare bewafa ki tarah
rah-e-manzil mein baiTho na yun haar kar
raunde jaoge tum naqsh-e-pa ki tarah
karwan karwan pahunche manzil pe hum
rah badalti rahi rahnuma ki tarah
Ghazal
Jis ko jaana tha kal tak KHuda ki tarah
Shola Haspanvi