Jis ko aadat wasl ki ho hijr se kyunkar bane

jis ko aadat wasl ki ho hijr se kyunkar bane
jab uThe ye gham ki dil ka aaina patthar bane

ab jo wo banwaen gahna yaad rakhna gul-farosh
phul bach jaen to meri qabr ki chadar bane

baad aaraish balaen kaun lega mere baad
yaad karna mujh ko jab zulf-e-pari-paikar bane

hai tumhaare samne to jaan ka bachna muhaal
tum se jab chhuTen to dekhen ghair se kyunkar bane

donon aashiq tere aur donon ki yakja bud-o-bash
meri jaan jaan-o-jigar mein dekhiye kyunkar bane

aarzu-mand-e-shahadat ki wasiyyat sab se hai
nam khoda jae mera jab koi KHanjar bane

dil mushabbak ho gaya tir-e-nigah-KHana se
ab tumhaari yaad ke aane ko lakhon ghar bane

ghair se koi talluq hi na rakh ai jang-ju
gar bigaD mujh se bigaD jo kuchh bane mujh par bane

KHuftagan-e-KHak chaunk uTThe chale kuchh aisi chaal
aaj to ai meri jaan tum fitna-e-mahshar bane

chahte ho tum rahun mar kar bhi main qadmon se dur
kahte ho qabr us ki mere kuche se bahar bane

mar ke bhi paen lab-e-saqi ka bosa kya majal
wan na pahunche gar hamari KHak ka saghar bane

daman-e-qatil ke dhabbon ki gawahi ho zarur
gar hamare KHun ka ai dosto mahzar bane

dil mujhe achchha bura jaisa banaya de diya
sar to koi puchhta kaisa bane kyunkar bane

qabr ka kona ho maskan dam nikal jae 'rashid'
KHana-e-tan gir chuke jaldi ki apna ghar bane