jin ke honTon pe hansi panw mein chhaale honge
han wahi log tumhein chahne wale honge
mai barasti hai fazaon pe nasha tari hai
mere saqi ne kahin jam uchhaale honge
shama wo lae hain hum jalwa-gah-e-jaanan se
ab do-alam mein ujale hi ujale honge
un se mafhum-e-gham-e-zist ada ho shayad
ashk jo daman-e-mizhgan ne sambhaale honge
hum baDe naz se aae the teri mahfil mein
kya KHabar thi lab-e-izhaar pe tale honge
Ghazal
Jin ke honTon pe hansi panw mein chhaale honge
Parwaz Jalandhari