jigar ko chaak ki dil ko lahu lahu kije
hayat ko kisi unwan surKH-ru kije
nahin hai hausla mar mar ke zinda rahne ka
to kaun kahta hai jine ki aarzu kije
hai chaak chaak bahut zindagi ka pairahan
KHuda ke waste kuchh koshish-e-rafu kije
lahu se pahle gulistan ko kijiye sairab
phir us ke baad tamanna-e-rang-o-bu kije
tumhaari bazm mein aai kahan se ye raunaq
nazar mila ke zara hum se guftugu kije
ba-faiz-e-ishq taqaddus-maab hain hum log
hamara zikr bhi kije to ba-wazu kije
qalam uThe to rahe azmat-e-qalam ka KHayal
ai 'mansha' yunhi sada hifz-e-abru kije
Ghazal
Jigar ko chaak ki dil ko lahu lahu kije
Mohammad Mansha ur Rahman Khan Mansha