jhuka hua hai jo mujh par wajud mera hai
KHud apne ghaar ka patthar wajud mera hai
ye chap, tirgi, niche ko ja raha zina
isi surang ke andar wajud mera hai
nahin hai is mein kisi ki shirakat-nafsi
ye baat tai hai sarasar wajud mera hai
mushabah donon hain phir bhi ruKH-e-tamanna se
tere wajud se baDh kar wajud mera hai
ye hadd-e-KHirgi jis par hai jalwa-ara tu
bas is se agle qadam par wajud mera hai
Ghazal
Jhuka hua hai jo mujh par wajud mera hai
Rafiq Sandelvi