Jaisi nigah thi teri waisa fusun hua

jaisi nigah thi teri waisa fusun hua
jo kuchh tere KHayal mein tha jun-ka-tun hua

baad-e-muKHalifat jo kabhi tez-tar hui
sargarm aur bhi tera jazb-e-darun hua

KHurshid aap le ke chala tujh ko sae sae
teri muwafaqat mein falak wazhgun hua

tere tufail jati rahi KHar se chubhan
shadabiyon mein mazra-e-hasti fuzun hua

azmat kare salam tere nam ki mudam
parcham teri wafat ke din sar-nigun hua