Jab tak ki tabiat se tabiat nahin milti

jab tak ki tabiat se tabiat nahin milti
hon pyar ki baaten bhi to lazzat nahin milti

aaram ghaDi-bhar kisi karwaT nahin milta
rahat kisi pahlu shab-e-furqat nahin milti

jab tak wo khinche baiThe hain dil un se ruka hai
jab tak nahin milte wo tabiat nahin milti

jite hain to hoti hai un aankhon se nadamat
marte hain to us lab se ijazat nahin milti

us zohd par nazan na ho zahid se ye kah do
tasbih phirane hi se jannat nahin milti

kya DhunDhte hain gor-e-ghariban mein wo aa kar
kis Kushta-e-raftar ki turbat nahin milti

kis tarah mere ghar wo 'hafiz' aaen ki un ko
ghairon ki mudaraat se fursat nahin milti