jab se aaya hun tere ganw mein
rang hi rang hain fazaon mein
aa ki dukh sukh ki koi baat karen
baiTh kar shishamon ki chhanw mein
main bhi karta hun zabt ki koshish
to bhi taKHfif kar adaon mein
wo tera dafatan bichhaD jaana
wo mera dekhna KHalaon mein
ho agar koi gosh-bar-awaz
ek KHamoshi bhi hai sadaon mein
yahi mere liye ghanimat hai
sans le lun khuli fazaon mein
Ghazal
Jab se aaya hun tere ganw mein
Rifat Sultan