Jab sahar chup ho hansa lo hum ko

jab sahar chup ho hansa lo hum ko
jab andhera ho jala lo hum ko

hum haqiqat hain nazar aate hain
dastanon mein chhupa lo hum ko

KHun ka kaam rawan rahna hai
jis jagah chaho baha lo hum ko

din na pa jae kahin shab ka raaz
subh se pahle uTha lo hum ko

hum zamane ke satae hain bahut
apne sine se laga lo hum ko

waqt ke honT hamein chhu lenge
an-kahe bol hain ga lo hum ko