Jab aaftab na nikla to raushni ke liye

jab aaftab na nikla to raushni ke liye
jala ke hum ne parinde faza mein chhoD diye

tamam umr rahin zer-e-lab mulaqaten
na us ne baat baDhai na hum ne honT siye

supurdagi ka wo lamha kabhi nahin guzra
hazar bar mare hum hazar bar jiye

hazar bar wo aaya bhi aur chala bhi gaya
ek umr bit gai us ka e'tibar kiye

KHabar nahin ki KHala kis jagah pe ho maujud
zamin par bhi qadam phunk phunk kar rakhiye

safar bhi dur ka hai aur kahin nahin jaana
ab ibtida ise kahiye ki intiha kahiye

hawa uTha na saki bojh abr ka 'shahzad'
zamin ke ashk bhi aaKHir samundaron ne piye