jate jate ye nishani de gaya
wo meri aankhon mein pani de gaya
jagte lamhon ki chadar oDh kar
koi KHwabon ko jawani de gaya
mere hathon se khilaune chhin kar
mujh ko zaKHmon ki kahani de gaya
hal na tha mushkil ka koi us ke pas
sirf wade aasmani de gaya
KHud se sharminda mujhe hona paDa
aaina jab mera sani de gaya
mujh ko 'azar' ek fareb-e-arzu
KHub-surat zindagani de gaya
Ghazal
Jate jate ye nishani de gaya
Kafeel Aazar Amrohvi