jata hai jo gharon ko wo rasta badal diya
aandhi ne mere shahr ka naqsha badal diya
pahchan jin se thi wo hawale miTa diye
us ne kitab-e-zat ka safha badal diya
kitna ajib hai wo musawwir ki ghaur se
dekhe jo KHadd-o-KHal to chehra badal diya
wo khel tha mazaq tha ya KHauf tha koi
ek chaal chal ke us ne jo mohra badal diya
karta raha asiri ke ehsas ko shadid
zanjir khol di kabhi pahra badal diya
Ghazal
Jata hai jo gharon ko wo rasta badal diya
Fatima Hasan