Jaane kis kis ki tawajjoh ka tamasha dekha

jaane kis kis ki tawajjoh ka tamasha dekha
toD kar aaina jab apna hi chehra dekha

aa lage gor kinare to mila muzhda-e-wasl
raat Dubi to ubharta hua tara dekha

ek aansu mein hue gharq do-alam ke sitam
ye samundar to tere gham se bhi gahra dekha

yaad aata nahin kuchh bhi ki yahan duniya mein
kaun si chiz nahin dekhi magar kya dekha

ishq ke dagh hue mahw is aashob mein sab
TimTimata sa charagh-e-ruKH-e-zeba dekha

is ghalat-bini ka koi to natija hota
umr bhar bahr-e-bala-KHez ko sahra dekha

koi is KHwab ki tabir badal de ya-rab
ghar mein bahta hua ek KHun ka dariya dekha

kho gae bhiD mein duniya ki par ab tak 'shohrat'
sansana uTTha hai ji jab koi un sa dekha