Itni mushkil mein kabhi pahle to jaan aai na thi

itni mushkil mein kabhi pahle to jaan aai na thi
ai mohabbat jab meri tujh se shanasai na thi

zindagi mein sainkaDon gham the tere gham ke siwa
dil mein virane to the par itni tanhai na thi

rahguzar thi hadse the fasla tha dhup thi
barhana-pai thi lekin aabla-pai na thi

bach ke tufan se kisi surat nikal aae magar
hum wahan Dube jahan dariya mein gahrai na thi

ai masiha dekhne nikla tha main tera nizam
har taraf tu tha magar teri masihai na thi

apne zaKHmon ki numaish be-hison ke shahr mein
is dil-e-muztar ki nadani thi danai na thi