itna na ghum raat ko phulon ki bas mein
soe paDe hain chaaron taraf sanp ghas mein
har samt is ne aatishi shishe laga diye
saDkon pe log aae the kale libas mein
gardish mein zindagi rahi afwah ki tarah
umren guzar din gain KHauf-o-hiras mein
agla nisab nur-e-basirat se paDh liya
aankhen to chhoD aae the pahli class mein
ye aur baat zer-e-zamin dafan ho gain
warna jaDon ka KHun hai phal ki miThas mein
ab bar bar us ki taraf dekhte ho kya
ab sirf meri tishna-labi hai gilas mein
manzar kisi tilism ki zad mein na ho 'nasim'
sarson ka rang dauD raha hai kapas mein
Ghazal
Itna na ghum raat ko phulon ki bas mein
Naseem Abbasi