itna chup-chap talluq pe zawal aaya tha
dil hi roya tha na chehre pe malal aaya tha
subh-dam mujh ko na pahchan saka aaina
main shab-e-gham ki masafat se niDhaal aaya tha
phir Tapakti rahi sine pe ye shabnam kaisi
yaad aai na kabhi tera KHayal aaya tha
kahkashan mere darichon mein utar aai thi
mere saghar mein tera aks-e-jamal aaya tha
ab na wo zauq-e-wafa hai na mizaj-e-gham hai
hu-ba-hu garche koi teri misal aaya tha
Ghazal
Itna chup-chap talluq pe zawal aaya tha
Lutf-ur-rahman