ishq tasir se naumid nahin
jaan-sapari shajar-e-bid nahin
saltanat dast-ba-dast aai hai
jam-e-mai KHatam-e-jamshed nahin
hai tajalli teri saman-e-wajud
zarra be-partaw-e-KHurshid nahin
raaz-e-mashuq na ruswa ho jae
warna mar jaane mein kuchh bhed nahin
gardish-e-rang-e-tarab se Dar hai
gham-e-mahrumi-e-jawed nahin
kahte hain jite hain ummid pe log
hum ko jine ki bhi ummid nahin
Ghazal
Ishq tasir se naumid nahin
Mirza Ghalib