Ishq ki dastan hai pyare

ishq ki dastan hai pyare
apni apni zaban hai pyare

kal tak ai dard ye tapak na tha
aaj kyun mehrban hai pyare

saya-e-ishq se KHuda hi bachae
ek hi qahr man hai pyare

is ko kya kijiye jo lab na khulen
yun to munh mein zaban hai pyare

ye taghaful bhi hai nigah-amez
is mein bhi ek shan hai pyare

jis ne ai dil diya hai apna gham
us se tu bad-guman hai pyare

dil ka aalam nigah kya jaane
ye to sirf ek zaban hai pyare

mere ashkon mein ehtimam na dekh
aashiqi ki zaban hai pyare

hum zamane se intiqam to len
ek hasin darmiyan hai pyare

ishq ki ek ek nadani
ilm-o-hikmat ki jaan hai pyare

tu nahin main hun main nahin tu hai
ab kuchh aisa guman hai pyare

kahne sunne mein jo nahin aati
wo bhi ek dastan hai pyare

rakh qadam phunk phunk kar nadan
zarre zarre mein jaan hai pyare

kis ko dekhe se dil ko choT lagi
kyun ye utri kaman hai pyare

teri barham-KHiramiyon ki qasam
dil bahut saKHt jaan hai pyare

han tere ahd mein 'jigar' ke siwa
har koi shadman hai pyare