ishq ki anjuman ki baat karen
phir kisi gul-badan ki baat karen
bhul bhi jaen tirgi-e-hayat
muskuraati kiran ki baat karen
is jahan se KHizan ka daur gaya
lahlahate chaman ki baat karen
kya zaruri hai ju-e-shir ki baat
kyun na gang-o-jaman ki baat karen
surKH aanchal mein kasmasai hui
subh ki is dulhan ki baat karen
sathiyo gao inqilabi git
aao dar-o-rasan ki baat karen
Ghazal
Ishq ki anjuman ki baat karen
Haidar Ali Jafri