ishq ki aisi shan to hogi
is se teri pahchan to hogi
ganw ki laDki ka kya kahna
kuchh nahin wo insan to hogi
us ke nagar mein dil ke liye kuchh
surat-e-itminan to hogi
kuchh bhi kah lo dil ki KHalish ko
zist ka ye unwan to hogi
dar-o-rasan ke afsanon mein
kaif na hoga jaan to hogi
zer-e-lab wo mauj-e-tabassum
mere liye tufan to hogi
hansti hui wo chashm-e-suKHan-go
ahl-e-dil ki jaan to hogi
'ramz' wo kafir zulf-e-muattar
dil ka mere iman to hogi
Ghazal
Ishq ki aisi shan to hogi
Ramz Afaqi