ishq ke shahr ki kuchh aab-o-hawa aur hi hai
us ke sahra ko jo dekha to faza aur hi hai
tujh se kuchh kaam nahin dur ho aage se nasim
wa kare ghuncha-e-dil ko wo saba aur hi hai
nabz par meri abas hath tu rakhta hai tabib
ye maraz aur hai aur is ki dawa aur hi hai
gul to gulshan mein hazaron nazar aae lekin
us ke chehre ko jo dekha to safa aur hi hai
zahido wird-wazaif se nahin hasil-e-kar
jis ko ho husn-e-ijabat wo dua aur hi hai
ai jaras harza-dira ho na tu itna chup rah
pahunche pas-manda ba-manzil wo sada aur hi hai
mohtasib hum se abas kina rakhe hai 'hatim'
jo nasha hum ne piya hai wo nasha aur hi hai
Ghazal
Ishq ke shahr ki kuchh aab-o-hawa aur hi hai
Shaikh Zahuruddin Hatim