Is tarah kar gaya dil ko mere viran koi

is tarah kar gaya dil ko mere viran koi
na tamanna koi baqi hai na arman koi

har kali mein hai tere husn-e-dil-ara ki numud
ab ke daman hi bachega na gireban koi

mai-chakan lab nazar aawara nigahen gustaKH
yun mere pahlu se uTha hai ghazal-KHwan koi

zulf barham hai dil aashufta saba aawara
KHwab-e-hasti sa nahin KHwab pareshan koi

naghma-e-dard se ho jata hai aalam mamur
is tarah chheDta hai tar-e-rag-e-jaan koi