Is par jahan-e-raftagan hai

is par jahan-e-raftagan hai
ek dard ki raat darmiyan hai

aankhen hain ki rahguzar-e-sailab
aur dil hai ki Dubta makan hai

achchha hai ki sirf ishq kije
ye umr to yun bhi raegan hai

kis yaad ki chandni hai dil mein
ek lahr si KHun mein rawan hai

yaad aaya wahan gire the aansu
ab sabza o gul jahan jahan hai

har lahza badal rahi hai duniya
ai husn-e-sabaat tu kahan hai

dukh jhelo to ji kaDa hi rakhna
dil hai to hisab-e-dostan hai