is naznin ki baaten kya pyari pyariyan hain
palken hain jis ki chhuriyan aankhen kaTariyan hain
is baat par bhala hum kyunkar na zahr khawen
hum se wahi rukawaT ghairon se yariyan hain
Tuk safha-e-zamin ke KHake pe ghaur kar tu
sanea ne is pe kya kya shaklen utariyan hain
dil ki tapish ka apni aalam hi kuchh juda hai
simab o barq mein kab ye be-qarariyan hain
un mahmalon pe aawe majnun ko kyun na hasrat
jin mahmalon ke andar do do swariyan hain
jaga hai raat pyare tu kis ke ghar jo teri
palken nadidiyan hain aankhen KHumariyan hain
naumid hain ba-zahir go wasl se hum us ke
dil mein to sau tarah ki ummidwariyan hain
kya puchhta hai hamdam ahwal 'mushafi' ka
raaten andheriyan aur aKHtar-shumariyan hain
Ghazal
Is naznin ki baaten kya pyari pyariyan hain
Mushafi Ghulam Hamdani