Is dil mein agar jalwa-e-dil-dar na hota

is dil mein agar jalwa-e-dil-dar na hota
zinhaar ye dil mazhar-e-asrar na hota

hota na agar jam-e-mai-e-ishq se sarshaar
hargiz dil-e-diwana ye hoshyar na hota

hota na agar us ki mohabbat se sarokar
ye gham-zada ruswa sar-e-bazar na hota

hoti na kabhun is dil-e-bimar ko sehhat
gar lutf-e-masiha-e-lab-e-yar na hota

pita na agar jam-e-mai-e-ishq to hargiz
dil sirr-e-haqiqat se KHabar-dar na hota

hota na agar aaina-e-jalwa-e-dildar
dil mahr-sifat matla-e-anwar na hota

hota na agar ishq ko manzur ye izhaar
wahdat se ye kasrat ko sarokar na hota

aagah haqiqat se na hota kabhu 'asim'
KHadim ka agar faiz madad-gar na hota