Is chaman ka ajib mali hai

is chaman ka ajib mali hai
jis ne har shaKH kaT Dali hai

din ujala ganwa ke baiTh gaya
raat ne raushni chura li hai

gham ki ismat bachchi hui thi magar
waqt ne wo bhi raund Dali hai

moajiza ho jo bach nikal jae
panch shahbaz ek lali hai

ye tera adl kya hua yarab
koi adna hai koi aali hai

aankh mein chubh gae kai manzar
ab kahan nind aane wali hai

pahle waqton mein ho to ho shayad
dosti ab hasin gali hai

KHema-e-zabt ki tanaben khinch
kuchh ghaTa si barasne wali hai

chalte rahna kaThin hua 'hasrat'
panw zaKHmi hain raat kali hai