Ek raat baKHt sun main rindan ka sat paya

ek raat baKHt sun main rindan ka sat paya
irfan ke mulk-e-din par haq sun baraat paya

man-arafa-nafsahu ka anjan laga ko dekha
har chiz zat-e-haq bin main be-sabaat paya

yu nafs-e-dun hawa sun pakDe liya tha meri
murshid ki kafash uThain us sun najat paya

yu qaul o feal mera mujh iKHtiyar sun nin
hat panj mat ki main aapas ki zat paya

taslim kar apas kun us ki raza ke upar
mahbub ka apas par nit iltifat paya

ja but-kade mein dekha chashm-e-yagangi sun
haq bin nahin disya gar uzza-o-lat paya

ism-o-sifat ka jalwa ism-o-sifat mein dekha
har zat kun KHuda ki main ain-e-zat paya

qatra hai ain-e-dariya dariya hai ain-e-qatra
bhi donon ghair hi hain nadir yu baat paya

har shai hai ain-e-har-shai bhi shai hai ghair-e-har-shai
murshid ke lutf sun main kya KHub baat paya

mahtab-e-ilm sulga gul-rez marifat ke
kar jahal ko hawai KHush shabbaraat paya

run run zaban karun to us ki sana na sar si
'qurbi' karam sun haq ki kya KHush-nikat paya