ek KHalish ko hasil-e-umr-e-rawan rahne diya
jaan kar hum ne unhen na-mehrban rahne diya
kitni diwaron ke saye hath phailate rahe
ishq ne lekin hamein be-KHanuman rahne diya
aarzu-e-ishq bhi baKHshi dilon ko ishq ne
fasla mere aur un ke darmiyan rahne diya
apne apne hauslon apni talab ki baat hai
chun liya hum ne unhen sara jahan rahne diya
ye bhi kya jine mein jina hai baghair un ke 'adib'
shama gul kar di gai baqi dhuan rahne diya
Ghazal
Ek KHalish ko hasil-e-umr-e-rawan rahne diya
Adeeb Saharanpuri