Ek faqat sahil talak aata hun main

ek faqat sahil talak aata hun main
rau mein jaane kaise bah jata hun main

manzilon ki justuju mein bar-ha
manzilon se aage baDh jata hun main

bhagta hun raat jis jangal se dur
subh usi ko samne pata hun main

kis ufuq mein dafn ho jata hai din
har shab is uljhan ko suljhata hun main

mar gaya jo shaKHs mujh mein us ka roz
pattharon par nam khudwata hun main

qufl-e-abjad hun bas ek tartib se
kholne wala ho khul jata hun main

bar bar is shahr ko 'betab' kyun
ba-dil-e-na-KHwasta jata hun main