hujra-e-KHwab se bahar nikla
kaun ye mere barabar nikla
phaD-phaDaya mere bahar koi
aur parinda mere andar nikla
aankh se ashk nikal aae hain
ret se jaise samundar nikla
hijr ko KHwab mein dekha ek din
aur phir KHwab-e-muqaddar nikla
mere pichhe meri wahshat bhagi
main jo diwar gira kar nikla
aankh binai ganwa baiThi to
teri taswir se manzar nikla
raat sine ki haweli gunji
aur dil shor macha kar nikla
sham phaili to khula az-sar-e-nau
mera saya mera paikar nikla
Ghazal
Hujra-e-KHwab se bahar nikla
Hammad Niyazi