hui na KHatm teri rahguzar kya karte
tere hisar se KHud ko farar kya karte
safina gharq hi karna paDa hamein aaKHir
tere baghair samundar ko par kya karte
bas ek sukut hi jis ka jawab hona tha
wahi sawal miyan bar bar kya karte
phir is ke baad manaya na jashn KHushbu ka
lahu mein Dubi thi fasl-e-bahaar kya karte
nazar ki zad mein nae phul aa gae 'azhar'
gai ruton ka bhala intizar kya karte
Ghazal
Hui na KHatm teri rahguzar kya karte
Azhar Iqbal