Hote hain KHush kisi ki sitam-raniyon se hum

hote hain KHush kisi ki sitam-raniyon se hum
waqf-e-bala hain apni hi nadaniyon se hum

kis munh se ja ke shikwa-e-jaur-o-jafa karen
marte hain aur un ki pashemaniyon se hum

miras-e-dasht-o-koh mein farhad o qais ki
ulfat ko puchhte hain bayabaniyon se hum

ghar baiThe sair hoti hai arz-o-sama ki roz
mahw-e-safar hain taba ki jaulaniyon se hum

kyunkar baghair jalwa-e-hairat taraaz-e-husn
paen najat dil ki pareshaniyon se hum

ai bani-e-jafa tera ehsan hai is mein kya
jite hain gar to apni giran-jaaniyon se hum