ho ke us kuche se aai to sitam Dha gai kya
kuchh samajh mein nahin aata ki saba pa gai kya
ye wahi mera nagar hai to mere yar yahan
ek basti mere pyaron ki thi kaam aa gai kya
meri sarhad mein ghanimon ka guzar kaise hua
thi saron ki wo jo diwar khaDi Dha gai kya
yun to kahne ko bas ek mauj thi pani ki magar
dekhna ye hain ki pal-bhar mein ghazab Dha gai kya
baad muddat ke mila hai to mere yar bata
teri aankhon mein jo ek barq thi kajla gai kya
ab kisi baat mein bhi ji nahin lagta mera
dil mein aa baiThi thi jo KHwahish-e-duniya gai kya
tazkire jis ke kitabon mein paDha karte the
dekh bhai wo qayamat ki ghaDi aa gai kya
tere chehre pe 'umar' aaj ye raunaq kaisi
phir tabiat koi mauzu-e-suKHan pa gai kya
Ghazal
Ho ke us kuche se aai to sitam Dha gai kya
Umar Ansari