hirs-e-mal-o-manal mein khoya
hum ne farda bhi haal mein khoya
ek lamha tha tujh ko pane ka
wo bhi fikr-e-maal mein khoya
main ne pindar-e-ashiqi sara
ek adhure sawal mein khoya
wo sitara jo rah dikhlata
KHud ghurur-e-kamal mein khoya
karwan mahw hai andheron mein
rahnuma qil-o-qal mein khoya
saaten sar-nigun guzarti hain
waqt is ke KHayal mein khoya
main bhi karb-e-talab mein gum 'partau'
wo bhi sehr-e-jamal mein khoya
Ghazal
Hirs-e-mal-o-manal mein khoya
Partav Rohila