hausla shart-e-wafa kya karna
band muTThi mein hawa kya karna
jab koi sunta na ho bolna kya
qabr mein shor bapa kya karna
qahr hai lutf ki surat aabaad
apni aankhon ko bhi wa kya karna
dard Thahrega wafa ki manzil
aks shishe se juda kya karna
dil ke zindan mein hai aaram bahut
wusat-e-dasht-numa kya karna
sham-e-kushta ki tarah ji lije
dam ghuTe bhi to gila kya karna
mere pichhe mera saya hoga
pichhe muD kar bhi bhala kya karna
kuchh karo yun ki zamana dekhe
shor galiyon mein sada kya karna
Ghazal
Hausla shart-e-wafa kya karna
Kishwar Naheed