har waraq ek kitab ho jae
aks-e-jalwa naqab ho jae
phul dekha tha KHwab mein kal ek
aaj tabir-e-KHwab ho jae
KHud-baKHud teri lai pe bajne lage
sans tar-e-rabab ho jae
ek mushkil ka waqt wo hoga
jab dua mustajab ho jae
ek qayamat hai aap ka wada
chaliye ye bhi azab ho jae
mujh ko kanTon pe tolne wale
tu shagufta gulab ho jae
sajda-e-ishq kar ada 'tarazi'
ye bhi kar-e-sawab ho jae
Ghazal
Har waraq ek kitab ho jae
Abdul Mannan Tarzi