har ek sans hi hum par haram ho gai hai
ye zindagi to koi intiqam ho gai hai
jab aai maut to rahat ki sans li hum ne
ki sans lene ki zahmat tamam ho gai hai
kisi se guftugu karne ko ji nahin karta
meri KHamoshi hi mera kalam ho gai hai
parinde hote to Dali pe lauT bhi jate
hamein na yaad dilao ki sham ho gai hai
idhar to roz ke marne se hi nahin fursat
udhar wo zindagi fursat ka kaam ho gai hai
hazaron aansuon ke baad ek zara si hansi
kisi gharib ki mehnat ka dam ho gai hai
bana na pai kabhi aadaton ko apna ghulam
ye zindagi to KHud un ki ghulam ho gai hai
purani yaadon ne jab bhi laga liya phera
is ujDe dil mein baDi dhum-dham ho gai hai
Ghazal
Har ek sans hi hum par haram ho gai hai
Rajesh Reddy