har ek dar pe sar ko Tapakne ke bawajud
kabe pahunch gaya hun bhaTakne ke bawajud
kya kijiye ki gard talab ki jami rahi
daman-e-dil ko rose jhaTakne ke bawajud
shayad khuli hai aap ke aane se chandni
dhundli si lag rahi thi chhiTakne ke bawajud
kaisa hai ye bahaar ka mausam ki bagh mein
hansti nahin hain kaliyan chaTakne ke bawajud
hum bhi kitab-e-zist ko paDhte chale gae
ek ek harf-e-gham pe aTakne ke bawajud
ab ke junun mein aalam-e-shoridgi na puchh
qaem raha hai sar ko paTakne ke bawajud
rahat guzar di hai baDi shan se hayat
aankhon mein zindagi ki khaTakne ke bawajud
Ghazal
Har ek dar pe sar ko Tapakne ke bawajud
Om Krishn Rahat