har-chand sahaara hai tere pyar ka dil ko
rahta hai magar ek ajab KHauf sa dil ko
wo KHwab ki dekha na kabhi le uDa ninden
wo dard ki uTTha na kabhi kha gaya dil ko
ya sans ka lena bhi guzar jaana hai ji se
ya marka-e-ishq bhi ek khel tha dil ko
wo aaen to hairan wo jaen to pareshan
ya-rab koi samjhae ye kya ho gaya dil ko
sone na diya shorish-e-hasti ne ghaDi bhar
main lakh tera zikr sunata raha dil ko
rudad-e-mohabbat na rahi is ke siwa yaad
ek ajnabi aaya tha uDa le gaya dil ko
juz gard-e-KHamoshi nahin 'shohrat' yahan kuchh bhi
kis manzil-e-abaad mein pahuncha liya dil ko
Ghazal
Har-chand sahaara hai tere pyar ka dil ko
Shohrat Bukhari