hangama-e-sukut bapa kar chuke hain hum
ek umr us gali mein sada kar chuke hain hum
apne ghazal-e-dil ka nahin mil raha suragh
sahra se shahr tak to pata kar chuke hain hum
ab tesha-e-nazar se ye dil TuTta nahin
is aaine ko sang-numa kar chuke hain hum
har bar apne panw KHala mein aTak gae
sau bar KHud ko rizq-e-hawa kar chuke hain hum
ab is ke baad kuchh bhi nahin iKHtiyar mein
wo jabr tha ki KHud ko KHuda kar chuke hain hum
Ghazal
Hangama-e-sukut bapa kar chuke hain hum
Salim Saleem