hum wo nalan hain boli-Tholi mein
bulbulon ko jo len ThiTholi mein
jama-zebon se us ko nisbat kya
lakh TukDe hain gul ki choli mein
ranj-e-gham khane ko KHuda ne diya
kya nahin mujh gada ki jholi mein
alf-laila sune wo gul to sunaen
bulbulen ek hazar boli mein
KHun-e-nahaq hamara uchhlega
rang laya jo shoKH holi mein
chashm-e-ibrat se dekh parda-nashin
shakl tabut ki hai Doli mein
sabza-e-KHat ho kyun na jauhar-e-KHal
zahr tiryak ki hai goli mein
bosa us sarw-e-qad se hum aazad
mang lete hain boli-Tholi mein
'shad' ro ro diya hai shabnam ne
jab gulon ne liya ThiTholi mein
Ghazal
Hum wo nalan hain boli-Tholi mein
Shad Lakhnavi