hum uTh jaenge mahfil se to un ko justuju hogi
hamara zikr aaega hamari guftugu hogi
ye mana dekhne ko wo zamana hum nahin honge
hamein DhunDegi duniya jab tumhaari justuju hogi
kisi ka KHun-e-nahaq raegan to ja nahin sakta
wafa ka rup nikhrega mohabbat surKH-ru hogi
tumhaare nam se pahle hamara nam aaega
jahan ishq-o-wafa ke silsile mein guftugu hogi
baDa pur-lutf hoga wo niyaz-o-naz ka aalam
nazara tu karega dil nazar se guftugu hogi
farogh-e-jalwa-gah-e-naz apni hi nazar tak hai
wahan tak jalwe bhi honge jahan tak justuju hogi
tajalli KHud bhi parda hai magar jab dil se dekhenge
ba-har-surat nigahon mein wo surat hu-ba-hu hogi
nazar ka muddaa dil ki tamanna kaun dekhega
wo jaan-e-arzu hoga to kis ko aarzu hogi
bikhar jaega sab husn-e-chaman-bandi ka shiraaza
hawa-e-sar-kashi mein jab faza-e-rang-o-bu hogi
hum is munh bolti bechaargi par dam-ba-KHud honge
wo honge samne be-KHud nigah-e-jalwa-ju hogi
saliqa aate aate aaya hai nazron se pine ka
'rishi' ab mai-kashi be-gana-e-jam-o-subu hogi
Ghazal
Hum uTh jaenge mahfil se to un ko justuju hogi
Rishi Patialvi